ES DUREN 'PAK KASDI' BANCAR - PURBALINGGA

Foto by Blog Ardilawet

‪#‎ILovePurbalingga‬ | Sedulur, wis lawas kye ora nulis. Pengin nulis maning. Critane agi kangen karo kota Perwira, kota kelahirane Panglima Besar Jenderal Soedirman.

Awan-awan hawane panas, enake nginum apa yah? Nginum es kayane seger ya sedulur?

Ya kuwe bener, angger rika padha agi nang Purbalingga utawa ana rencana plesir, ana kuliner ngetop jenenge Es Duren Bancar. Es Duren duweke Pak Kasdi kiye wis kawentar nang ngendi ora.

Media lokal lan nasional wis padha ngrasakna segere es duren sing jerene special banget. Tivi-tivi swasta nasional ya wis pada ngonoh. Foto-fotone pada ditempel nang temboke warung.

Para pejabat pemerintah sing kala mangsa padha niliki Purbalingga, ora keliwatan mampir uga meng nganah. Jan pancen, jere es'e suegeerr lan nylekamin.

Ora mung kuwe sedulur, media internasional sing siki duwe cabang nang Indonesia ya kuwe CNN, ya wis mengonoh lho!

Jan pancen pak kasdi ya...pinter temen ulih gawe es duren. Buket mbleketaket wujud lan rasane.

Es durene pak kasdi kiye regane 15 ewu semangkok. Angger rega es duren special campur kopyor ditarip telu likur ewu sedulur. Hawane panas semromong nang awak, angger wis nginum es duren..jaan langsung mak nyesss!!

Panggonane kuwe nang ngarep bunderan Tugu Bancar, seberange Kodim Purbalinggga utawa pedeke Jembatan Kali Klawing. Pokoke gampang goletane. Digoleti nang mbah google ya wis akeh sing nuduhi dalan.

Rika pada sing manggon utawa agi dolan nang Purwokerto, aja khawatir. Es durene pak kasdi kiye uga mbuka cabang nang kawasan GOR satria lan nang ngarep kantor BKD. Sing dodol nang kana ya putra-putrane pak kasdi. Rasa karo rega ya pada bae ndean.

Es duren bancar kiye bisa ngentongna duren 5000-6000 wiji sewulane. Sing hebat maning, es duren pak kasdi dodol setahun muput. Ngger ora nana duren lokal, ya ulih kiriman duren interlokal. Jan maherel banget ya usahane.

Wis semene bae sedulur, wis magean diparani bakul es durene nganah. Aja mung ngiler tok. Ndang dilapi kuwe sing ngencesh. Hehehe

Nang sangkan paran, 26 Mei 2016
‪#‎Purbalingga‬
‪#‎KotaPerwira‬
‪#‎EsDurenPurbalingga‬
‪#‎EsDurenPakKasdi‬
‪#‎EsDurenBancar‬

Fotone sekang blog'e Ardilawet.

Sumber beritane: 

1. http://m.cnnindonesia.com/gaya-hidup/20141117143223-262-11999/es-duren-legendaris-dari-kota-ngapak-purbalingga/

2. http://purbalingganews.net/index.php/wisata-kuliner/1829-es-duren-bancar-memang-cetar

3. http://m.timesindonesia.co.id/baca/125773/20160522/163236/semangkuk-es-duren-pak-kasdi-purbalingga-yang-legit-dan-terkenal/

4. http://ardilawetradio.blogspot.qa/2015/07/lebaran-asyik-part-es-duren.html?m=1

MUSEUM JENDRAL SOEDIRMAN NANG PURBALINGGA

‪#‎ILovePurbalingga‬ | Umah kiye wis tuwa. Umah model joglo. Esih diopeni maen tekan siki. Umah sing dadi seksi lahire Panglima Besar Jendral Soedirman.

Umah rama biyunge Jendral Soedirman kiye wis diubah dadi Museum utawa Monumen, ben kena nggo pengeling-eling bocah nom. Ben ora pada klalen karo sejarahe Purbalingga.

Museum Jendral Soedirman Purbalingg0a diadegna tanggal 6 Februari 1976. Wektu kuwe jaman dipimpin Pak Bupati Goentoer Darjono, sing jenenge siki digawe jeneng Stadion Utama Purbalingga.

Nang museum kiye, esih kesimpen rapi barang-barang sing dadi seksi jamane Soedirman cilik. Kamar sing nyekseni lahire pahlawan besar Nusantara. Ayunan rotan sing dinggo Pak Dirman uga esih ana. Lan barang-barang liyane.

Angger rika kepengin mengeneh, gampang goletane. Sekang Alun-alun Purbalingga jarake sekitar 37 Kilometer lewat jalur Kalikajar.

Mangga ditonton sedela video liputan sekang AntaraNews TV sing ngliput wulan Agustus 2015 wingi.

Nang sangkan paran, 17 Mei 2016

Kyeh videone sedulur...

PAK KASUR

‪#‎ILovePurbalingga‬ | Jaman cilik miyen, jamane sekolah sering kon nyanyi "Bangun tidur kuterus mandi
Tidak lupa menggosok gigi
Habis mandi kutolong Ibu
Membersihkan tempat tidurku"
Esih kemutan ora rika? Mesti esih lah!

Sing nyiptakna lagu kuwe jenenge Pak Kasur. Jebule beliau kuwe putra kelahiran Purbalingga 26 Juli 1912. Jeneng asline Pak Soerjono.

Diundang Pak Kasur mergane piyambake ngopeni acara kepanduan nang TVRI. Biasane diundang Kak Sur. Saking seringe diundang Kak Sur dadine terkenal Kasur utawa Pak Kasur.

Lagu-lagu liyane sing sering ditembangna nang bocah-bocah ya kuwe: Naik delman, dakocan, kring-kring ada sepeda, lihat kebunku, lan dua mata saya. Lagu ciptaane kuwe nganti satus telu loh. Akehe pool.

Piyambake wafat tahun 1992 nang Jakarta.

Pak Kasur kepetung dadi inspirasi tumrape bocah-bocah. Lagu-lagune melegenda. Tetep enak ditembangna kapan baen. Tur maning, ora klalen koh!

Wassalam,
14 Mei 2016

Fotone sekang mbah google, ngger infone dijukut sekang lik wikipedia.

PRAWAN PABRIK

‪#‎IlovePurbalingga‬ | Rika pada esih kelingan ora karo lagune Kang Dedi Pitak sing judule Prawan Pabrik? Lagu kiye sempat kawentar tahun 2008 an. Lagu kiye nyritakna perjuangane gadis-gadis Purbalingga sing pada ngode dadi karyawan pabrik rambut.

Nganti tekan sekiye, pabrik rambut nang Purbalingga esih akeh. Malah ngger dibandingna 8 tahun sedurunge, siki tambah akeh.

Pabrik rambut kaya wis dadi sawahe wong Bralink. Malahan kaya kewalik, sing wadon ngode, sing lanange pada momong bocah nang ngumah. Ya ora kabeh si, tapi kayane akeh sing kaya kuwe.

Ya wis dadi jamane ndean. Rep kepriwe maning, daripada ngode adoh-adoh nang Jakarta ya mending ngode nang nggone dewek. Seadoh-adohe Purbalingga li ora ana apa-apane dibanding lunga ngode nang ibukota.

Setitik akeh, pabrik rambut uga wis ngawehi tambahan pendapatan daerah. Milyaran investasi dalam lan luar negeri mlebu kota perwira. Pabrik-pabrik sing ngadeg nang Purbalingga: Royal Korindah, SunChang, Indokores, Sofyan, lan liya-liyane. Anu akeh banget koh.

Saking akehe pabrik rambut nang Purbalingga, aben isuk jam nem nganti jam setengah woluan...gili kayong sing kebek motor. Ramene ora patut. Ngang ngeng ora mandeg-mandeg. Nganti arep ngeculna bocah sekolah numpak pit ben madan was-was.

Semene bae sedulur. Muga-muga pada ayem tentrem urip nang Kota Perwira.

Wassalam,
13 Mei 2016

OWABONG WAYAH SORE

‪#‎ILovePurbalingga‬ | Kanggone rika pada sing esih penasaran utawa urung tau meng Owabong. Kye video penampakan Owabong wayahe sore. Pas nyuting video kiye sekitar jam 04 sore, sejam sedurunge tutup. Wis amleng, soale sing padha plesir wis padha mentas sekang kolam.

Tek syuting juga banyune sing mili banter lan seger. Banyu sing kayane ora mandeg-mandeg. Ngileni seambane lokawisata owabong sing kawentar nang ngendi papan. Ben dina pengunjunge sekang ndi ora.

Owabong...Byuuuuuuurrrrrrr!!!

Klilaaaannn

12 Mei 2016

JEMBATAN GANTUNG SINDANG-BANJARAN

‪#‎ILovePurbalingga‬ | Jembatan gantung kuwe ora mung maen nang San Fransisco tok. Aja salah, nang Purbalingga uga ana. Ngandel ora rika? Ngger urung percaya, mageh tek tuduhi.

Jembatan kiye jenenge Jembatan Sindang-Banjaran. Mergane apa dijenengi sindang-banjaran? Mergane dinggo nyambung transportasi desa sindang nang kecamatan mrebet lan desa banjaran kecamatan bojongsari.

Seliyane nggo penghubung rong desa, jembatan sing dawane 700 meter kiye sering dinggo selfie nang bocah nom. Maklum bae siki jamane padha narsis. Fota-foto dewek. Ana juga sing pada foto prewed utawa foto sedurunge nikahan.

Jembatan sindang kiye direnovasi tahun 2015 kepengker sing ngentekna duit milyaran. Muga-muga bae awet ya sedulur.

Dibangun nang nduwure Kali Klawing. Kali sing pok-pokane nang kali serayu. Sing nggawa manfaat kanggo masyarakat Purbalingga lan sekitare.

Rika esih penasaran nang ndi nggone jembatan sindang banjaran? Aja khawatir kakang mbekayu, kiye tek nei ngerti.

Hasile mlaku-mlaku karo mbah gugel, jarake sekang alun-alun Purbalingga mung 8.7 kilometer. Ora adoh mbok? Pancen koh!

Rika bisa nganggo petunjuke gugel map sing tek lampirna. Utawa ra sah nganggo ya ra papa. Gampang ikih.

Kiye petunjuk peta gugel: https://goo.gl/maps/AXgZJEmWyq52

.

Pokoke angger rika wis butul prapatan pasar bojongsari, belok kanan bae meng arah desa patemon. Bar kuwe gari lurus ngetutna dalan aspal.

Angger ketemu TPA (Tempat Pembuangan Sampah Akhir) Bojongsari, dijamin rika urung butul. Esih lurus maning ya kang, nganti pertelon, aja belok nengen, tapi belok ngiwe getutna dalan sing urung diaspal. Sekitar sekilometer sekang kono, rika wis tekan sing dituju.

Mayuh padha diparani meng nganah. Maen tulih. Maen maning ngger rika padha ngepit. Hawane seger. Lingkungan sekitare ya asri. Cocok banget nggo ngisi wektu liburan karo keluarga. Awake sehat, pikirane padhang. Cara basane bocah sekolah, men sana in corporisano. Kaya kuwe mbok kang? 😃

Klilaaan...

12 Mei 2016

PATUNG JENDRAL SOEDIRMAN

‪#‎ILovePurbalingga‬ | Jendral Soedirman, Putra kelahiran asli Kota Purbalingga. Digelari pangkat Jendral Besar merga perjuangane rikala mbebasna Bangsa Indonesia sekang cengkremane Bangsa Jepang lan Walanda.

Sebare merdeka, jenenge dinggo jeneng dalan-dalan utama nang kota-kota gede. Kota kecamatan, kabupaten, propinsi nganti ibukota negara.

Nang Purbalingga, kejaba dinggo jeneng dalan uga dipengeti karo ngadege Patung Jendral Soedirman. Nggone nang bunderan ngarep Polres Purbalingga.
Foto sing tek pajang kuwe tek jukut jamane sedurunge rubuh. 

Alhamdulillah siki wis ngadeg gagah maning. Ya kena nggo pengenget-enget generasi enom. Utamane generasi peneruse Purbalingga. Ben pada ngerti bahwa nang Purbalingga tau lahir pahlawan gede.

Klilaaan...
12 Mei 2016